Ætlar að aflétta trúnaði á skýrslu um Íraksstríðið

George Bush, Bandaríkjaforseti, ætlar að aflétta trúnaði á nokkrum hlutum skýrslu sem lekið var í fjölmiðla um helgina. Í henni kemur fram að stríðið í Írak hafi aukið hryðjuverkaógnina í heiminum.

Bush sagði í dag að margir hefðu getið sér til um hvað stæði í skýrslunni og komist að þeirri niðurstöðu að innrásin í Írak hefði verið mistök. Hann væri því algjörlega ósammála. Hann sagði að mikilvægir hlutar skýrslunnar yrðu gerðir opinberir eins fljótt og hægt er. Kröfu Demókrata þess efnis að lokaðar umræður færu fram í fulltrúadeild bandaríska þingsins um skýrsluna hefur hins vegar verið hafnað.