Heimsmeistarinn handleggsbrotinn

Vonir heimsmeistarans Sebastien Loeb um að vinna sinn þriðja titil í röð í rallakstri hafa nú minnkað til muna eftir að kappinn datt af baki fjallahjóli sínu í Sviss með þeim afleiðingum að hann handleggsbrotnaði. Loeb hefur reyndar 35 stiga forskot í stigakeppni ökumanna, en ljóst þykir að hann muni missa af Tyrklandsrallinu sem fram fer um miðjan næsta mánuð.

Alls eru 12 af 15 mótum ársins þegar búin og í raun nægir honum að koma einu sinni í viðbót í mark á undan sínum helsta keppinaut - eða hafna í fjórða sæti ef Grönholm sigrar - til að tryggja sér þriðja titilinn í röð.

Loeb hefur þegar fest sig í sessi sem einn besti ökuþór allra tíma í rallinu og hefur enginn unnið fleiri sigra en hann í sögunni. Næsta keppni eftir Tyrklandsrallið er í Ástralíu um mánaðarmótin október-nóvember og standa vonir manna til þess að hann verði búinn að jafna sig fyrir þann tíma.

Loeb er 32 ára gamall og ekur fyrir Kronos Citroen.