Fimm leikir í nótt

Fimm æfingaleikir fóru fram á undirbúningstímabilinu í NBA liðna nótt. New Jersey er enn án sigurs eftir fjóra leiki, en Toronto hefur unnið alla fjóra leiki sína á undirbúningstímabilinu. Grannaslagur LA Lakers og LA Clippers verður sýndur beint á NBA TV í nótt klukkan hálf tvö.

Denver lagði Indiana 114-102 á útivelli í nótt. Kenyon Martin skoraði 20 stig og hirti 8 fráköst fyrir Denver á aðeins 23 mínútum en þurfti svo að fara meiddur af velli. Stephen Jackson skoraði 13 stig fyrir Indiana.

Detroit lagði Minnesota 112-103. Mike James skoraði 15 stig fyrir Minnesota gegn sínum gömlu félögum og Marko Jaric skoraði einnig 15 stig. Miðherjinn Nazr Mohammed skoraði 20 stig fyrir Detroit.

Boston lagði New Jersey 94-90. Paul Pierce skoraði 18 stig fyrir Boston, en Vince Carter skoraði 23 stig fyrir New Jersey og Nenad Krstic skoraði 21 stig og hirti 7 fráköst.

Toronto vann auðveldan sigur á Cleveland 103-81. Jorge Garbajosa skoraði 16 stig fyrir Toronto en Drew Gooden skoraði 15 stig fyrir Cleveland, sem var án lykilmanna eins og LeBron James í leiknum, en einnig vantaði menn eins og Chris Bosh í lið Toronto.

Loks vann Houston öruggan sigur á Milwaukee 111-97. Michael Redd skoraði 21 stig fyrir Milwaukee en Yao Ming skoraði 22 stig fyrir Houston og Steve Novak var með 17 stig.