Mutombo ósáttur við kynþáttafordóma

Miðherjinn Dikembe Mutombo hjá Houston Rockets lenti í orðaskaki við einn stuðningsmanna Orlando Magic í æfingaleik liðanna í NBA í fyrrakvöld eftir að hafa orðið fyrir kynþáttaníð í lok þriðja leikhlutans.

Manninum var umsvifalaust vikið úr húsi af öryggisvörðum fyrir að kalla Mutombo apa og fór þessi uppákoma mjög í skapið á Afríkumanninum hávaxna, sem er einn elsti leikmaðurinn í deildinni.

"Það er ótrúlegt að vita til þess að svona lagað finnist ennþá og að vera kallaður api er svívirðilegt gagnvart mér, fjölskyldu minni og kynþætti. Ef ég verð sektaður fyrir að láta manninn heyra það - veð ég upp í áhorfendastæðin og geri eitthvað í málinu næst þegar þetta kemur fyrir," sagði Mutombo hundfúll.