Kaman og Howard gera nýja samninga

ESPN sjónvarpsstöðin í Bandaríkjunum hefur greint frá því að miðherjinn Chris Kaman hjá LA Clippers og framherjinn Josh Howard hjá Dallas Mavericks séu nú búnir að framlengja samninga sína við lið sín í NBA deildinni.

Chris Kaman er sagður hafa samþykkt nýjan samning til fimm ára sem hljóðar upp á rúmar 50 milljónir dollara. Kaman hefði verið með lausa samninga við Clippers næsta sumar og talið var að mörg lið væru tilbúin að bjóða honum hæsta mögulega samning ef hann yrði laus þá. Kaman skoraði um 12 stig og hirti 9,6 fráköst á síðasta tímabili.

Þá er greint frá því að Dallas sé búið að ná samþykki framherjans Josh Howard fyrir nýjum fjögurra ára samningi sem færir honum 10 milljónir dollara á ári. Howard hefði orðið með lausan samning í sumar ef hann hefði ekki samið fyrir 31. október, en miklar vonir eru bundnar við þennan skemmtilega leikmann í framtíðinni.