Enn tapa New York og Boston

Þrír leikir fóru fram í NBA deildinni í körfubolta í nótt og unnust þeir allir á útivöllum. Cleveland lagði New York í Madison Square Garden, Seattle vann óvæntan sigur á New Jersey og Orlando skellti Boston.

Cleveland lagði New York 102-96 þar sem LeBron James og Damon Jones skoruðu 29 stig hvor fyrir Cleveland - Jones skoraði 7 þrista úr 10 tilraunum - en Nate Robinson skoraði 19 stig fyrir New York og Channing Frye 17 stig og hirti 9 fráköst.

Orlando lagði Boston 92-89 þar sem Jameer Nelson skoraði 24 stig, Grant Hill skoraði 18 stig og Dwight Howard skoraði 17 stig og hirti 15 fráköst í liði Orlando. Paul Pierce skoraði 21 stig fyrir Boston, en hitti aðeins úr 6 af 20 skotum sínum utan af velli.

Loks vann Seattle góðan útisigur á New Jersey 119-113 þar sem Luke Ridnour setti persónulegt met með 32 stigum og gaf 7 stoðsendingar. Rashard Lewis skoraði 27 stig og hirti 11 fráköst og þeir Ray Allen og Chris Wilcox skoruðu báðir 22 stig. Vince Carter skoraði 38 stig fyrir New Jersey, Nenad Krstic skoraði 21 stig og Jason Kidd skoraði 20 stig, gaf 12 stoðendingar og hirti 6 fráköst.