Sigurganga Dallas heldur áfram

Dallas vann í nótt 11. leikinn í röð í NBA deildinni þegar liðið vann auðveldan sigur á Toronto. Utah lagði San Antonio í uppgjöri efstu liðanna í deildinni og þá tapaði Cleveland enn eina ferðina fyrir einu af lakari liðum deildarinnar.

Dallas burstaði Toronto 117-98 þar sem Josh Howard skoraði 26 stig fyrir Dallas en Chris Bosh og TJ Ford skoruðu 18 stig hvor fyrir Toronto. Dirk Nowitzki meiddist á auga í fyrsta leikhluta og sneri ekki aftur.

Utah vann mjög þýðingarmikinn sigur á San Antonio á heimavelli sínum 83-75 og heldur efsta sætinu í deildinni með 13 sigra og aðeins 3 töp. Carlos Boozer skoraði 23 stig og hirti 16 fráköst hjá Utah en Tim Duncan skoraði 21 stig og hirti 10 fráköst fyrir San Antonio.

Cleveland tapaði fyrir New York á heimavelli sínum 101-98. LeBron James skoraði 27 stig fyrir Cleveland en Quentin Richardson skoraði 27 stig og hirti 9 fráköst fyrir New York.

Atlanta lagði Charlotte 99-90. Joe Johnson skoraði 36 stig fyrir Atlanta, en Sean May skoraði 21 stig og hirti 17 fráköst fyrir Charlotte og Raymond Felton skoraði einnig 21 stig.

New Jersey lagði Boston á útivelli 106-103 þar sem heimamenn voru með unninn leik í höndunum en klúðruðu öllum sem hægt var að klúðra á lokamínútunum og mikið er nú skrifað um vanhæfi Doc Rivers þjálfara Boston á vefsíðum í Bandaríkjunum. Paul Pierce skoraði 31 stig fyrir Boston en Vince Carter skoraði 23 stig og hirti 9 fráköst fyrir New Jersey.

Phoenix lagði Houston 102-91. Amare Stoudemire skoraði 22 stig og hirti 15 fráköst fyrir Phoenix en Tracy McGrady skoraði 23 stig fyrir Houston.

Orlando heldur áfram góðri sigurgöngu sinni á vesturströndinni og lagði liðið Seattle á útivelli í nótt 94-84. Dwight Howard skoraði 24 stig, hirti 12 fráköst og hitti úr öllum 8 skotum sínum utan af velli fyrir Orlando en Ray Allen skoraði 21 stig fyrir Seattle.

Golden State tapaði naumlega fyrir Indiana á heimavelli 108-106. Al Harrington skoraði 28 stig fyrir Indiana en Monta ellis skoraði 27 stig fyrir Golden State og Baron Davis skoraði 24 stig, hirti 9 fráköst og gaf 9 stoðsendingar.

Loks vann LA Clippers auðveldan sigur á Memphis 105-90. Cuttino Mobley skoraði 24 stig fyrir Clippers og Elton Brand skoraði 20 stig og hirti 9 fráköst. Hakim Warrick skoraði 22 stig fyrir Memphis.