Ellefu sigrar í röð hjá Phoenix

Phoenix vann í nótt ellefta leik sinn í röð í NBA deildinni í körfubolta þegar liðið skellti Orlando á útivelli 103-89. Amare Stoudemire skoraði 30 stig fyrir Phoenix í leiknum. Þá vann Utah auðveldan sigur á Dallas 101-79 og færði Jerry Sloan þjálfara þúsundasta sigurleikinn á ferlinum. Carlos Boozer skoraði 31 stig og hirti 11 fráköst fyrir Utah, en Dirk Nowitzki skoraði 26 stig og hirti 10 fráköst fyrir Dallas.

Philadelphia tapaði áttunda leiknum í röð og lá fyrir Portland 81-79, Miami lagði Toronto 99-77, New Jersey vann Memphis 105-92 þar sem Vince Carter skoraði 37 stig, þar af 9 þrista úr 20 tilraunum. Boston lagði New York 97-90, New Orleans lagði Cleveland 95-89, Chicago lagði Indiana 106-91 og San Antonio burstaði LA Clippers á útivelli 103-81.