Synirnir á báðum áttum með pabba

„Synir mínir eiga safnið og hafa skyldað mig til að horfa á það allt,“ segir leikarinn Ellert Ingimundarson en hann hefur verið ráðinn til að tala fyrir hinn guðhrædda Ned Flanders í Simpson-myndinni sem frumsýnd verður í sumar.

Ellert bætist þar með í fríðan hóp leikara en meðal þeirra sem hafa þegar verið ráðnir eru Örn Árnason fyrir hlutverk Hómers, Margrét Vilhjálmsdóttir sem talar fyrir Marge og Álfrún Örnólfsdóttir en hún bregður sér í hlutverk hinnar ofurgáfuðu Lísu. Þá mun Sigrún Edda Björnsdóttir leika ólátabelginn og hrekkjalóminn Bart Simpson. Mikil eftirvænting ríkir eftir myndinni enda hefur gula fjölskyldan skemmt heiminum í rúm átján ár í sjónvarpinu.

Ellert segist þó eiga lítið sameiginlegt með hinum kirkjurækna Flanders en býst við því að kynna sér hann aðeins betur. „Jafnvel að maður fari bara að kíkja í kirkju og ætli maður endi ekki bara uppi sem Ned fyrir rest,“ segir Ellert og hlær en viðurkennir um leið að hann sé enginn sérstakur aðdáandi þáttanna. „Nú ætla ég bara að leggjast yfir safn strákanna og kynnast þessum fýr aðeins betur,“ bætir Ellert við og segist ekkert hafa fylgst með þeim deilum sem hafa sprottið upp í kringum talsetningu kvikmyndarinnar.

Reyndar eru synir Ellerts miklir aðdáendur þáttanna og segir hann að þeir hafi verið á báðum áttum með þá ákvörðun pabbans að taka að sér þetta hlutverk. „En ég held að þetta sé allt að koma hjá þeim. Þeir verða líka bara að styðja við bakið á gamla manninum því annars fá þeir ekkert að borða.“