Barak aftur í ísraelska pólitík

Ehud Barak, fyrrverandi forsætisráðherra Ísraels, hefur tilkynnt að hann muni bjóða sig fram til formanns í verkamannaflokknum, gegn Amir Peretz, sem nú er formaður og varnarmálaráðherra í ríkisstjórn Ehuds Olmerts. Peretz hefur hríðfallið í vinsældum eftir að hernum tókst ekki að ráða niðurlögum Hizbolla, í stríðinu í Líbanon.

Peretz á ekki hermennskuferil að baki, eins og nánast allir leiðtogar Ísraels, og reynsluleysi hanns er meðal annars kennt um hversu illa gekk í Líbanon. Ehud Barak er hinsvegar fyrrverandi hershöfðingi og yfirmaður ísraelska herráðsins, auk þess sem hann hefur hlotið fleiri heiðursmerki en nokkur annar Ísraeli.

Í forsætisráðherratíð sinni lagði Barak megináherslu á að ná sáttum við Palestínumenn, og bauð Yasser Arafat að verða við nánast öllum kröfum hans. Arafat sagði nei, og Bill Clinton, forseti, sem var málamiðlari í viðræðum þeirra sagði að Arafat hefði misst af sögulegu tækifæri til að koma á friði í Miðausturlöndum.