Carmelo Anthony ekki valinn í stjörnuliðið

Framherjinn Carmelo Anthony hjá Denver var ekki á meðal þeirra leikmanna sem í kvöld voru valdir sem varamenn í Stjörnuleiknum sem fram fer í Las Vegas síðar í þessum mánuði. Talið er víst að þáttaka Anthony í slagsmálunum í New York fyrir nokkrum vikum hafi spilað stóran þátt í því að þessi stigahæsti leikmaður í NBA var ekki valinn í liðið.

Byrjunarlið austurs og vesturs voru valin fyrir nokkrum dögum og eru valin af þjálfurum allra liða í deildinni, sem þó mega ekki velja sína eigin leikmenn. Hér fyrir neðan má sjá hvaða leikmenn skipa stjörnuliðin árið 2007.

Austurdeild:

Byrjunarlið: LeBron James, Shaquille O'Neal, Chris Bosh, Dwyane Wade og Gilbert Arenas.

Varamenn: Chauncey Billups og Rip Hamilton frá Detroit, Vince Carter og Jason Kidd frá New Jersey og Jermaine O´Neal frá Indiana. Dwight Howard frá Orlando og Caron Butler frá Washington spila sinn fyrsta stjörnuleik.

Vesturdeild:

Byrjunarlið: Tim Duncan, Kevin Garnett, Yao Ming, Tracy McGrady og Kobe Bryant.

Varamenn: Steve Nash, Amare Stoudemire og Shawn Marion frá Phoenix, Allen Iverson frá Denver, Dirk Nowitzki frá Dallas, Tony Parker frá San Antonio og Carlos Boozer frá Utah sem valinn var í fyrsta sinn í stjörnuliðið.

Þrátt fyrir að Anthony hafi ekki verið valinn í stjörnulið Vesturdeildar að þessu sinni, er hann þrátt fyrir allt mjög líklegur til að fá að taka þátt í leiknum vegna þess að þeir Yao Ming og Carlos Boozer eru mjög ólíklegir til að taka þátt í Stjörnuleiknum vegna meiðsla.

Það vakti athygli að á meðan lið Phoenix fær réttilega þrjá fulltrúa í leiknum árlega, er aðeins einn maður frá sjóðheitu liði Dallas Mavericks. Ekki er ólíklegt að Josh Howard frá Dallas komi því vel til greina þegar kemur að því að velja varamann fyrir Ming og Boozer, þó hann spili vissulega aðra leikstöðu en hinir tveir.