Hillary Clinton er andstyggileg kona

Newt Gingrich, fyrrverandi forseti neðri deildar bandaríska þingsins, kallaði Hillary Clinton "andstyggilega konu," í viðtali við dagblaðið New York Post. Hann taldi líklegt að hún verði frambjóðandi demókrata í komandi forsetakosningum. Gingrich bætti því við að enginn kæmist í hálfkvist við Clinton kosningavélina í skítkasti.

Newt Gingrich er sjálfur að hugsa um að bjóða sig fram í forsetaembætti fyrir repúblikanaflokkinn, en hann tilheyrir hægri armi flokksins. Hann sagði í viðtalinu að kosningagengi Hillarys Clinton væri án efa eitt það hæfileikaríkasta í sögu Bandaríkjanna, en algjörlega vægðarlausa. "Þú getur ekki sigrað þetta gengi. Það er of miskunnarlaust. Það er of vel skipulagt. Það er of stórt. Það bara malar þig," sagði Newt Gingrich.