Flaug á hús tengdamóður

Bandarískur maður varð sjálfum sér og átta ára gamalli dóttur sinni að bana í Indíanafylki í gær, þegar hann flaug einshreyfils Cessna flugvél sinni á hús fyrrverandi tengdamóður sinnar. Tengdamóðurina sakaði ekki.

Eric Johnson deildi forræði yfir Emily dóttur sinni, með fyrrverandi eiginkonu sinni, Beth. Feðginin höfðu verið í viku fríi saman og Johnson átti að skila Emily á mánudagsmorgun. Þegar hann gerði það ekki, hringdi eiginkonan til lögreglunnar. Það var rétt áður en flugvélin flaug á hús tengdamóðurinnar.

Lögreglan segist viss um að Eric Johnson hafi ráðið sér og dóttur sinni bana með þessum hætti.