Reiðir út af 12 ára böðli

Margir Afganar eru reiðir yfir því að Talibanar skyldu nota 12 ára gamlan dreng til þess að taka af lífi mann sem þeir sögðu hafa svikið málstaðinn. Tekið var upp á myndband þegar drengurinn skar af honum höfuðið með stórum hnífi. Viðstaddir hrópuðu á meðan; "Allahu Akbar !, Guð er mikill.

Múslimskur kennimaður sagði að það væri rangt af Talibönum að nota ungan dreng til verknaðarins. Hann sagði að þetta gæfi fólki af öðrum trúarbrögðum ranga mynd af Islam. Ættarhöfðingi í þorpi í Afganistan tók í sama streng. Hann sagði að islamstrú leyfði engum að taka höfuðið af manni. Talibanar gæfu þarna ranga mynd af Islam.

Talibanar sjá þó ekki eftir neinu. Einn leiðtoga þeirra sagði að þeir vildu senda vantrúuðum þau skilaboð að börn Talibana berðust einnig gegn þeim.