Eftirlit á netinu eykst ár frá ári

Umfang ríkiseftirlits á internetinu er sífellt að aukast að sögn nýútkominnar skýrslu um efnið. Samtökin Óháð Internet stóðu að henni en í þeim eru rannsóknarhópar frá háskólunum í Harvard og Oxford, meðal annarra.

Í skýrslunni skoðuðu samtökin þúsundir vefsíðna í 41 landi og í ljós kom að svo virtist sem 25 lönd reyndu að ritskoða efni á internetinu. Þá sagði að aðeins örfá ríki hefðu staðið að slíkri ritskoðun árið 2002 og því virtist sem ritskoðun hefði aukist mikið.

Þrjár meginástæður eru taldar liggja að baki ritskoðuninni. Ástæðurnar eru stjórnmálalegs eðlis, af öryggistoga og til þess að vernda ríkjandi gildi í samfélaginu.

Eftirfarandi lönd voru tekin fyrir í skýrslunni:

Aserbaíjan, Bahrain, Búrma/Mýanmar, Kína, Eþíópía, Indland, Íran, Jórdanía, Líbýa, Marokkó, Óman, Pakistan, Sádi-Arabía, Singapore, Suður-Kórea, Súdan, Sýrland, Tajikistan, Taíland, Túnis, Túrkmenistan, Sameinuðu arabísku furstadæmin, Úsbekistan, Víetnam og Jemen.