Fær ekki að vita af andláti föður síns

Forráðamenn áströlsku útgáfu sjónvarpsþáttarins Big Brother sæta mikilli gagnrýni eftir að þeir ákváðu að segja ekki keppanda í þættinum að faðir hennar sé látinn. Keppendur í þættinum eru lokaðir inni í húsi í ákveðinn tíma og mega engin samskipti hafa við umheiminn á meðan dvöl þeirra í húsinu stendur.

Umsjónarmenn þáttarins segja þetta gert í samráði við fjölskyldu konunnar. Þeir segja að faðir hennar, sem lést úr krabbameini í síðustu viku, hafi ekki viljað koma henni úr jafnvægi. Hann hafi heldur ekki viljað að henni fyndist hún þurfa að yfirgefa húsið til þess að mæta í jarðarför hans.

Kærasti konunnar sagði hana eflaust eiga eftir að verða fyrir áfalli þegar hún kemur loks úr húsinu en að hún ætti sennilega eftir að skilja ákvörðunina.