Gullbaðkeri stolið af japönsku hóteli

Lögregla í Japan klórar sér nú í höfðinu eftir að gullbaðkeri var stolið af hóteli í Tókíó í nótt. Baðkerið var áttatíu kíló að þyngd og rúmlega sextíu milljón króna virði. Það var inni á almennu baðherbergi karlmanna á tíundu hæð hótelsins.

Engin merki voru um að baðkerið hefði verið dregið í burtu. Lögreglan segist þó halda að fleiri en einn hafi komið að þjófnaðinum. Sams konar gullbaðker er á almennu baðherbergi kvenna á hótelinu og er það enn á sínum stað.