Sigurpáll og Nína sigruðu á Koprunni - þriðji hringurinn blásinn af

Sigurpáll lék hringinn í dag á 70 höggum eða 2 höggum undir pari og lauk 36 holum á samtals 2 höggum yfir pari. Ottó Sigurðsson, Magnús Lárusson og Örn Ævar Hjartarson urðu jafnir í 2.-4. sæti á samtals 8 höggum yfir pari.

Ottó Sigurðsson, sem var með forystu eftir fyrsta hringinn ásamt Sigmundi Einari Mássyni og Alfreð Kristinssyni, lék hringinn í dag á 78 höggum. Sigmundur lék á 80 höggum í dag og Alfreð á 82 höggum.

Nína Björk er að sigra á stigamóti í fyrsta sinn, en oft hefur hún lent í öðru og þriðja sæti. Hún var einu höggi á undan Ragnhildi Sigurðardóttur, sem varð önnur. Hin unga og efnilega, Signý Arnórsdóttir úr GK, hafnaði í þriðja sæti og er þetta í fyrsta sinn sem hún kemst á verðlaunapall í stigamóti fullorðinna.

Bætt hefur töluvert í vindinn eftir því sem liðið hefur á daginn og þá hafa komið miklar skúrir. Veðurstofan spáir að veðrið muni verða svipað það sem eftir er dags. Þetta er annað mótið í röð sem mótstjórn fellir niður lokahringinn á Kaupþingsmótaröðinni vegna veðurs.

www.kylfingur.is