At­vinnu­kylfingur féll niður um lyftu­stokk

Hinn 36 ára gamli Pavan var í Höfðaborg vegna Investec South African Open, sem hófst 26. febrúar, þegar hann varð fyrir þessu óhappi í einkagistingu sinni á miðvikudag.

Pavan kallaði á lyftuna en tók ekki eftir því þegar dyrnar opnuðust að engin lyfta beið eftir honum. Hann féll niður um nokkrar hæðir og var fluttur á sjúkrahús til aðhlynningar vegna meiðsla sinna.

Pavan gekkst undir aðgerð á sjúkrahúsinu.

Þegar The Athletic hafði samband við talsmann DP World Tour staðfesti hann að Pavan hefði dregið sig úr mótinu í Stellenbosch-golfklúbbnum vegna meiðsla en sagði að þeir gætu ekki gefið frekari upplýsingar um atvikið vegna trúnaðar um heilsufarsupplýsingar.

Pavan, sem gerðist atvinnumaður árið 2010, hefur tvisvar sigrað á DP World Tour og hefur átta sigra alls. Hann hefur tekið þátt í þremur risamótum: Opna bandaríska meistaramótinu árin 2014 og 2025 og Opna breska meistaramótinu árið 2019.

Merkilegasti sigur hans til þessa kom árið 2019 þegar hann sigraði Matt Fitzpatrick í umspili og var krýndur sigurvegari BMW International Open í München í Þýskalandi.

Síðast keppti hann á Qatar Masters í Doha fyrr í þessum mánuði, þar sem hann komst ekki í gegnum niðurskurðinn.

„Að öllu frásögðu er hann við góða heilsu, þakklátur fyrir að vera á lífi og í myndsímtali við börnin sín,“ sagði J.T. Higgins, fyrrverandi háskólaþjálfari Pavan, eins og haft er eftir honum á Golfchannel.com.