Það verður svart -ef ekkert verður hvítt

Ef jöklar á Suðurskautinu bráðna mun yfirborð sjávar hækka um 60 metra. Grænlandsjökull myndi hækka yfirborðið um sjö metra. Bráðnandi jöklar munu á næstu áratugum hafa áhrif á líf hundruða milljóna manna um allan heim. Þetta segir í nýrri skýrslu 70 manna sérfræðinganefndar Sameinuðu þjóðanna.

Og aðeins eins metra hækkun á yfirborði sjávar myndi valda tjóni upp á 950 millljarða dollara og stefna 145 milljónum manna í hættu vegna flóða.

Þarna er auðvitað verið að tala um verstu hugsanlegu afleiðingar. En í skýrslunni kemur einnig fram að þótt aðeins 20 prósent af íshellunni á Grænlandi bráðnuðu og fimm prósent af Suðurskautinu, myndi yfirborð sjávar hækka um fjóra til fimm metra.

Metangas er öflug gróðurhúsagastegund sem er bundin í miklu magni þar sem sífreri er í jörðu.