Skorinn á háls vegna rispu á bíl

Nítján ára kínverskur karlmaður var skorinn á háls í Västerås í Svíþjóð í gær með þeim afleiðingum að hann lést. Lögreglan í Svíþjóð hefur lýst eftir 28 ára gömlum karlmanni í tengslum við morðið. Atvikið átti sér stað á bílaplani og höfðu mennirnir mælt sér mót þar til að gera upp rispu á bíl hins meinta morðingja.

Mennirnir rifust heiftarlega og endaði rifrildið með fyrrgreindum afleiðingum. Að sögn vitna spýttist blóðið úr hálsi mannsins. Hann var fluttur á nærliggjandi sjúkrahús en ekki gekk að bjarga lífi hans. Lögreglan er vongóð um að finna hinn grunaða en báðir mennirnir voru þekktir af lögreglu.