Birgir: Ætla mér að vera undir parinu

Birgir Leifur Hafþórsson lauk leik á parinu í dag á Johnny Walker mótinu í Skotlandi. Hann hefur einu sinni áður leikið Gleneagles völlinn sem hannaður var af Jack Nicklaus en það var fyrir sex árum sem Birgir lék völlinn síðast. Birgir sagði í samtali við Kylfing.is að aðstæður hefðu verið fínar í morgun, nánast enginn vindur og þægilegar vallaraðstæður.

,,Ég var sáttur við minn leik í dag og var aldrei í tiltölulegum vandræðum. Það vantaði bara að púttin myndu detta hjá mér og ég var í fullt af fuglafærum sem vildu ekki í holuna. Þessi tvö bogey sem ég fékk voru frekar klaufaleg eins og þau eru yfirleitt," sagði Birgir.

,,Ég ætla mér að vera undir parinu í þessu móti en það getur allt breyst á morgun en ég mun gera eins vel og ég get og við sjáum bara hvað kemur út úr því. Völlurinn er hörku bani og umgjörðin hérna er flott. Nicklaus hannaði völlinn og ber hann þess merki, svolítið amerískt lúkk á þessu með löngum brautum. Þetta er alvöru völlur," sagði Birgir sem núna er í 62. sæti í mótinu ásamt fleiri kylfingum en fyrsta keppnisdegi er enn ekki lokið svo lokastaða Birgis eftir fyrsta dag skýrist ekki fyrr en líður á daginn.

Kylfingur.is