Ísraelar vilja loka fyrir rafmagn til Gaza strandarinnar

Ísraelar ráðgera að loka fyrir rafmagn til Gaza strandarinnar vegna eldflaugaárása þaðan yfir til Ísraels. Ehud Barak varnarmálaráðherra Ísraels samþykkti í gær að draga úr raforkuveitu til strandarinnar. Ekki var sagt hvenær byrjað yrði á því.

Hamas samtökin hertóku Gaza ströndina í sumar og hröktu þaðan liðsmenn Mahmoud Abbas, forseta. Síðan hefur verið haldið uppi stöðugum eldflaugaárásum. Saeb Erekat, einn af nánustu ráðgjöfum Abbas fordæmdi þessa ætlan í dag. Ein og hálf milljón Palestínumanna búa við illan kost á Gaza ströndinni.

Erekat hvatti þjóðir heims til þess að vernda þá fyrir þessum aðgerðum og þrýsta á Ísraela að fara að alþjóðlegum mannúðarlögum.