Kompás og Út og Suður eru frétta- og/eða viðtalsþættir ársins

Kompás og Út og Suður fengu sameiginlega Edduverðlaun í flokknum frétta- og/eða viðtalsþáttur ársins. Kiljan, þáttur Egils Helgasonar, sem sýndur er á RÚV, hlaut verðlaun í flokknum menningar/lífstílsþáttur ársins. Gettu Betur var valinn skemmtiþáttur ársins.

Nanna Kristín Magnúsdóttir var valin leikkona ársins og Ingvar E. Sigurðsson var valinn leikari ársins, en bæði léku þau í myndinni Foreldrar og Jörundur Ragnarsson var valinn leikari ársins í aukahlutverki fyrir myndina Veðramót.

Syndir feðranna fékk verðlaun í flokkum heimildarmynd ársins. Þetta er mynd um afdrif drengja sem voru vistaðir á upptökuheimilinu að Breiðavík í Rauðasandshreppi 1955-1974. Leikstjórar myndarinnar eru Ari Alexander Ergis Magnússon og Bergsteinn Björgúlfsson, en Bergsteinn fékk einnig verðlaun í flokknum Myndataka og klipping fyrir myndina Foreldrar.

Gunnar Árnason fékk verðlaun í flokknum hljóð og tónlist, en hann sá um hljóðvinnslu fyrir Kalda slóð. Árni Páll Jóhannsson, sem sá um leikmyndina í Kaldri slóð, fékk verðlaun fyrir útlit myndar. Bræðrabylta var valin stuttmynd ársins og sjónvarpsmaður ársins er Egill Helgason.

Útsending frá Edduverðlaununum hófst klukkan tuttugu mínútur fyrir átta. Veðramót, mynd Guðnýjar Halldórsdóttur, hlaut flestar tilnefningar eða ellefu talsins.