Isinbayeve bætti heimsmet sitt

Rússneska stúlkan Yelena Isinbayeva bætti í gær eigið heimsmet í stangarstökki þegar hún vippaði sér yfir 5,04 metra á móti í Mónakó. Hún bætti gamla metið sitt um sentimetra, en það setti hún þann 11. júlí sl.

"Það var gaman að slá metið heima, því þetta er í fyrsta skipti sem ég keppi á móti síðan ég flutti til Mónakó. Mig langaði mikið að standa mig vel hérna, en ég var satt best að segja ekkert að hugsa um að setja heimsmet," sagði þessi magnaða íþróttakona.

Hún er talin afar sigurstrangleg á ÓL í Kína í næsta mánuði, en þetta var 23. heimsmet hennar á ferlinum. Isinbayeva er aðeins 26 ára gömul.