Þrjár milljónir seldust

Platan In Rainbows með Radiohead hefur selst í rúmum þremur milljónum eintaka síðan hún kom út fyrir ári síðan. Er þá bæði átt við netsölu og sölu í plötubúðum. Þetta kom fram í ávarpi Jane Dyball á ráðstefnunni You Are In Control sem lauk nýverið á Hótel Sögu.

Dyball er yfirmaður viðskiptadeildar útgáfufyrirtækis Radiohead, Warner Chappell, og þykir eiga hvað mestan heiðurinn af velgengni plötunnar.

Mikil leynd hafði hvílt yfir útgáfu In Rainbows, bæði hvernig staðið var að henni og hvernig hún hafði í raun selst. Aðdáendur sveitarinnar gátu ráðið því hvort þeir borguðu fyrir plötuna, sem var algjör nýlunda, og vakti uppátækið gríðarlega athygli í fjölmiðlum.

Í ávarpi Dyball kom fram að áður en In Rainbows kom í búðir hafði hún þegar selst betur en síðasta plata Radiohead þar á undan, Hail to the Thief, seldist í búðum. Í ávarpinu kom einnig fram að bæði útgáfufyrirtækið og hljómsveitin hafi grætt meira á plötunni en mögulegt hefði verið með hefðbundnu fyrirkomulagi.

Í dag hefur In Rainbows selst í 1,75 milljónum eintaka í búðum, auk þess sem hundrað þúsund eintök í viðhafnarútgáfum hafa selst í gegnum heimasíðu Radiohead. Á netinu hefur platan því selst í rúmri milljón eintaka, bæði í gegnum heimasíðu sveitarinnar og aðrar síður á borð við iTunes.