Akureyri vann FH í toppslagnum

Akureyri er nú eitt á toppi N1-deildar karla eftir sigur á FH í Hafnarfirði í kvöld, 34-32. Heimamenn voru þó með yfirhöndina í hálfleik, 17-14.

Akureyringar náðu þar með að hefna ófaranna en FH-ingar hafa tvívegis unnið þá í haust, bæði í deild og bikar.

Árni Þór Sigtryggsson fór mikinn í liði Akureyrar og skoraði ellefu mörk, þar af þrjú úr vítum. Hörður Fannar Sigþórsson og Andri Snær Stefánsson skoruðu fimm mörk hvor.

Hjá FH var Aron Pálmarsson sem fyrr atkvæðamikill og skoraði ellefu mörk. Ásbjörn Friðriksson og Ólafur Guðmundsson komu næstir með fimm mörk hvor.

Í markinu hjá FH varði Magnús Sigmundsson 21 skot en markverðir Akureyrar vörðu samtals tólf skot.

Þá vann Valur sigur á Víkingi, 31-22, eftir að hafa verið með átta marka forskot í hálfleik, 17-9.

Baldvin Þorsteinsson skoraði flest mörk Valsmanna, sjö talsins, en þeir Orri Freyr Gíslason og Arnór Gunnarsson komu næstir með fimm mörk hvor. Hjá Víkingi var Sverrir Hermannsson markahæstur með sjö mörk.

Að síðustu gerðu Fram og HK jafntefli, 29-29. Valdimar Þórsson fór mikinn í liði Fram og skoraði tólf mörk en þeir Gunnar Steinn Jónsson og Ragnar Hjaltested voru með fjögur hvor.

Hjá Fram var Rúnar Kárason atkvæðamestur með níu mörk, Haraldur Þorvarðarson skoraði sex og Guðjón Finnur Drengsson fimm.

Sem fyrr segir er Akureyri í efsta sæti deildarinnar með tólf stig. Valur er í öðru sæti með ellefu og FH í því þriðja með tíu. Fram og HK koma næst með átta stig en Fram á leik til góða. Víkingur er svo í neðsta sæti með eitt stig.