Verður trú sögunni

Leikstjórinn Zack Snyder, segir að nýjasta mynd sín Watchmen, verði trú upprunalegu teiknimyndasögunni sem hún er gerð eftir. „Ég vona að áhorfendur verði yfir sig hrifnir, alveg eins og ég var þegar ég las teiknimyndasöguna," sagði Snyder, sem á að baki myndirnar Dawn of the Dead og 300.

Höfundur teikimyndasögunnar, Alan Moore, segist ekkert vilja með bíómyndina hafa og vill ekki að nafn sitt komi fram í tengslum við hana. „Alan hefur haft slæma reynslu af Hollywood," sagði breski listamaðurinn Dave Gibbons, sem sá um teikningarnar í fyrstu Watchman-sögunni sem kom út árið 1987. Snyder segir að ákvörðun Moore hafi valdið sér vonbrigðum en hann virði hana engu síður.

Watchmen, sem verður frumsýnd næsta vor, gerist í Bandaríkjunum á níunda áratugnum þar sem grímuklæddar hetjur berjast við vondu karlana.