Skikkuð til að læra sund

Þýskur dómstóll hefur úrskurðað að tólf ára gömul múslimatelpa geti ekki sleppt sundkennslu vegna trúar sinnar.

Fjölskyldan fór í mál við skólann þegar ekki var fallist á að hún sleppti sundinu. Foeldrarnir vildu ekki að hún sæist í aðskornum sundfötum.

Skólinn reyndi að koma til móts við foreldrana með því að bjóða telpunni að synda í sokkabuxum (leggings) og bol. Foreldrarnir sögðu að það yrði ennþá hægt að sjá líkama hennar í gegnum blaut fötin.

Dómurinn komst hinsvegar að þeirri niðurstöðu að skylda yfirvalda til að kenna telpunni að synda vægi þyngra en brot gegn trú hennar.

Auk þess færi kennslan fram í vatni og því mjög lítill tími sem líkami hennar væri sjáanlegur.

Foreldrarnir ætla að áfrýja.