Aldrei að vita nema Ólafur verði með eftir áramót

Nú styttist óðum í fyrstu verkefni íslenska landsliðsins í handbolta í forkeppni EM, en meiðsli lykilmanna íslenska liðsins og óvissa með framtíð Ólafs Stefánssonar setja þar nokkuð strik í reikninginn.

Ólafur Stefánsson fyrirliði gaf ekki kost á sér í næstu verkefni með landsliðinu og þá eiga þeir Snorri Steinn Guðjónsson og Alexander Petersson við meiðsli að stríða.

Íslenska liðið tekur á móti Belgum hér heima þann 29. þessa mánaðar og sækir svo Norðmenn heim þann 1. nóvember.

Guðmundur Guðmundsson framlengdi samning sinn við HSÍ til ársins 2012 í hádeginu og honum til aðstoðar verða áfram þeir Óskar Bjarni Óskarsson og Kristján Halldórsson.

"Það er ekki útséð með það að þessir leikmenn missi af næstu verkefnum, en svona eru íþróttirnar. Við munum byggja á sama kjarna og var á Ólympíuleikunum en við þurfum að fá nýjan mann inn fyrir Ólaf og eitt og annað þannig. Meiðsli þessara lykilmanna koma á slæmum tíma, en þannig er það alltaf í þessu. Það þýðir ekkert að velta sér upp úr því," sagði Guðmundur í samtali við Vísi.

Kristján mun fá það verkefni að stýra B-liðinu áfram og verkefni sem kallað hefur verið 2012 hópurinn. Þar verður markmiðið að gera íslenska landsliðshópinn breiðari og fá yngri leikmönnum reynslu af því að spila landsleiki.

"Við þurfum breiðari landsliðshóp og þess vegna erum við með þetta hliðarverkefni sem við köllum 2012 hópinn. Markmiðið er að finna þessum hóp regluleg verkefni, helst tvisvar á ári eða oftar," sagði Guðmundur.

En er Ólafur Stefánsson út úr myndinni í komandi verkefnum?

"Hann er ekki inni í myndinni í augnablikinu, en það er aldrei að vita nema hann komi og veri með okkur eftir áramót. Hann hefur gaman að því að koma og hitta okkur," sagði Guðmundur.