Mætti með exi á NATO fund

Nýr fulltrúi Rússlands hjá Atlantshafsbandalaginu er þekktur fyrir að vera harðskeyttur þjóðernissinni. Hann hafði líka með sér exi þegar hann kom til fyrsta formlega NATO fundar síns í dag. Dmitry Rogozin hjó þó ekki mann og annan.

Auk þess að vera harðskeyttur þjóðernissinni hefur Dmitry nefnilega góða kímnigáfu. Og hann vildi með þessu bjóða NATO að grafa stríðsöxina.

Ekki þarf þó að búast við öðru en hvíni í Dmitry á næstu vikum og mánuðum þegar rædd verða deilumál Rússa og NATO. Þau eru mörg og flókin þessa dagana, enda hafa samskipti Rússa og Vesturlanda farið stöðugt versnandi undanfarin misseri.