Bandaríkin viðurkenna Kosovo

Bandaríkin hafa viðurkennt sjálfstæði Kosovo. Búist er við að nú fari slíkar tilkynningar að streyma til hins nýja lands. Því fer þó fjarri að allir séu sáttir.

Rússar eru mjög á móti og hafa beðið um neyðarfund í öryggisráðinu. Serbar eru náttúrlega æfir.

Bretar, Frakkar og Þjóðverjar hafa beitt sér fyrir því innan Evrópusambandsins að það viðurkenni sjálfstæðið sem heild. Því eru Spánverjar andvígir og hafa þvert á móti sagt að þeir muni ekki viðurkenna sjálfstæði landsins.

Spánverjar óttast að með því væru þeir að hella olíu eldana í Baskahéruðum landsins. Baskar berjast fyrir sjálfstæðu ríki sínu á Norður-Spáni. Grikir og Rúmenar eru einnig tregir vegna eigin minnihlutahópa.