Hugsa um hvort fiskur sem borðaður er sé í útrýmingarhættu

Íslensk stjórnvöld hafa töluverðar áhyggjur af tilraunum umhverfissinna til þess reyna að fá fólk til þess að hætta að kaupa fisk sem þeir segja sjálfir að sé í útrýmingarhættu.

Einar K. Guðfinnsson sjávarútvegsráðherra hefur bent á að ekki séu gerð nein skil á milli fiskstofna hvar sem þeir eru í hafinu. Þanning séu þorskstofnar í hættu á vissum hafsvæðum en ekki öðrum. Umhverfissinnar eins og Grænfriðungar geri þarna engin skil. Þeir lýsi þorskinn í heild í hættu.

Sænska blaðið Kvöldpósturinn gerði könnun meðal lesenda sinna og leyfði þeim að fylgja atkvæði sínu eftir með athugasemd. Spurt var: „Hugsar þú um hvort fiskurinn sem þú borðar sé í útrýmingarhættu."

Niðurstaðan var sú að 47 prósent sögðu já en 39 prósent söðgu nei. Og 14 prósent sögðu stundum.

Í athugasemdum mátti meðal annars lesa þetta: „Allir hljóta að vita að við erum að útrýma þorskinum. Samt halda verslanir áfram að selja hann. Og við höldum áfram að kaupa."

Önnur athugasemd var á þessa leið: „Vísindamenn segja að þorstofninn sé í hættu. Sjómenn segja að það hafi aldrei verið meira af honum. Hverju eigum við að trúa?"