Romero vann í New Orleans

Argentínski kylfingurinn Andres Romero vann um helgina sigur í Zurich Classic-mótinu í New Orleans en þetta var fyrsti sigurinn hans á PGA-mótaröðinni.

Romero lék á 68 höggum í gær og lék samtals á þrettán höggum undir pari. Annar varð Peter Lonard frá Ástralíu á tólf höggum undir pari og Tim Wilkinson frá Nýja-Sjálandi varð þriðji á ellefu höggum undir pari.

Þetta er í sjötta skiptið á síðustu sjö árum sem kylfingur vinnur sinn fyrsta PGA-sigur í New Orleans. Þetta er því frægur vettvangur fyrir kylfinga að brjótast fram á sjónarsviðið og sérstaklega fyrir þá sem ekki eru bandarískir. Frægasta dæmið um þetta er Vijay Singh sem vann sitt fyrsta mót í New Orleans árið 2004.

Romero komst inn á Evrópumótaröðina í golfi með því að verða í fjórtánda sæti á Áskorendamótaröðinni árið 2005. Árið 2006 komst hann á lista 100 bestu kylfinga heims en það ár varð hann í áttunda sæti á opna breska meistaramótinu.

Ári síðar varð hann í þriðja sæti á sama móti og vann sinn fyrsta sigur á Evrópumótaröðinni.

Í ár hefur hann verið að komast hægt og rólega á skrið. Hann komst ekki í gegnum niðurskurðinn í fyrstu þremur mótum tímabilsins á PGA-mótaröðinni en kláraði síðustu þrjú mót fyrir sigurinn í New Orleans.