Favre hefur áhuga á að spila aftur

Það hefur mikið verið skrifað og skrafað um Brett Favre síðustu mánuði en sjálfur hefur hann ekki látið hafa eitt orð eftir sér - þar til nú. Þá hafði Favre ekki gefið viðtal síðan í febrúar.

Favre mætti í þátt Joe Buck og staðfesti sögusagnir þess efnis að Minnesota Vikings vildi fá hann í sínar raðir. Hann sagði jafnframt að Vikings væri eina liðið sem hann hefði rætt við.

Leikstjórnandinn aldni sagði Vikings henta sér vel þar sem hann þekkti sóknarleik liðsins vel.

Favre fór í aðgerð á öxl eftir síðasta tímabil og segir að það muni koma í ljós á næstu vikum hvort hann geti aftur kastað á eðlilegan hátt og án sársauka.

Hann staðfesti síðan að hann myndi kannski spila næsta vetur færi svo að öxlin væri í lagi.