Umfjöllun: Öruggt hjá landsliðinu

Íslenska karlalandsliðið í handbolta vann öruggan sigur á svokölluðu pressuliði í æfingaleik sem fór fram í Laugardalshöllinni í kvöld, 38-25. Staðan í hálfleik var 19-14 fyrir landsliðið.

Landsliðið byrjaði leikinn mikið betur og virtist ætla að keyra yfir Pressuliðið í upphafi. Pressuliðið rankaði smám saman við sér og eftir að hafa hrist af sér mesta skrekkinn byrjuðu þeir að láta til sín taka.

Munurinn aðeins fimm mörk í hálfleik. Hreiðar Guðmundsson kom í mark landsliðsins í síðari hálfleik og skellti í lás. Landsliðið skoraði í kjölfarið sex mörk í röð, öll úr hraðaupphlaupum, og ballið búið. Landsliðið skoraði í heildina úr 18 hraðaupphlaupum.

Hjá Pressuliðinu vakti Selfyssingurinn ungi, Ragnar Þór Jóhannsson, verðskuldaða athygli. Var áræðinn í aðgerðum sínum og kom eflaust öllum sem á horfðu á óvart. Haraldur Þorvarðarson var svo öflugur á línunni.

Varnarleikur liðsins var aftur á móti hreinasta hörmung og markvarslan nákvæmlega engin.

Hjá landsliðinu var Þórir Ólafsson í klassaformi og skoraði flott mörk. Gaman var að sjá Ólaf, Snorra og Arnór aftur með liðinu og vonandi koma fleiri til baka á næstunni.

Landsliðið-Pressuliðið 38-25 (19-14)

Mörk landsliðsins: Þórir Ólafsson 8 (9), Arnór Atlason 4 (8), Guðjón Valur Sigurðsson 4 (6), Vignir Svavarsson 3 (4), Alexander Petersson 3 (4), Ólafur Guðmundsson 3 (3), Bjarni Fritzson 2/1 (3/1), Snorri Steinn Guðjónsson 2/1 (4/2), Ólafur Stefánsson 2 (3), Sturla Ásgeirsson 2 (3), Aron Pálmarsson 2 (5), Heiðmar Felixson 1 (1), Róbert Gunnarsson 1 (1), Ingimundur Ingimundarson 1 (1), Sigurbergur Sveinsson (1).

Varin skot: Hreiðar Levý Guðmundsson 10 (21/2) 45%, Björgvin Gústavsson 6 (20/2) 30%.

Hraðaupphlaup: 18 (Vignir 3, Þórir 3, Guðjón 2, Alexander 2, Sturla 2, Arnór 2, Ólafur, Ingimundur, Snorri, Aron).

Fiskuð víti: 2 (Ólafur, Snorri).

Utan vallar: 4 mín.

Mörk Pressunnar: Arnór Þór Gunnarsson 6/4 (8/4), Haraldur Þorvarðarson 5 (7), Björgvin Þór Hólmgeirsson 3 (7), Oddur Grétarsson 3 (5), Ragnar Þór Jóhannsson 3 (7), Valdimar Þórsson 2 (7), Freyr Brynjarsson 1 (1), Fannar Friðgeirsson 1 (4), Ólafur Gústafsson 1 (6).

Varin skot: Birkir Ívar Guðmundsson 4 (23/1) 17%, Pálmar Pétursson 3 (22/1) 13%.

Hraðaupphlaup: 7 (Oddur 2, Freyr, Ragnar, Haraldur, Arnór, Ólafur).

Fiskuð víti: 4 (Orri, Haraldur, Fannar, Ragnar Hjalt.)