Ruglaði saman Michael Jordan og Michael Jackson

Knattspyrnugoðið Pele frá Brasilíu reynir nú hvað sem hann getur til þess að hjálpa borginni Ríó de Janeiró í heimalandi sínu að landa hlutverki mótshaldara á Ólympíuleikunum árið 2016.

Meðal annarra borga sem keppast um að halda leikana eru Tókýó höfuðborg Japan, Madrid höfuðborg Spánar og Chicago í Bandaríkjunum. Pele varð hins vegar á í messunni þegar hann ætlaði að skjóta létt á þá aðila sem sjá um kynninguna fyrir Chicago borg á fundi í Kaupmannahöfn.

Pele ætlaði að benda fundarmönnum góðfúslega á að þekktasti íþróttamaður borgarinnar, NBA goðsögnin Michael Jordan, væri ekki á kynningarfundinum en kallaði hann hins vegar ekki Michael Jordan heldur Michael Jackson.

Fundarmönnum í Kaupmannahöfn var mjög skemmt en þar ræðst á morgun hvort að þetta uppistand hjá Pele hafi verið til þess að hjálpa eða eyðileggja fyrir Ríó de Janeiró þegar tilkynnt verður hvaða borg verður fyrir valinu.