Sigurður: Frábært hugarfar hjá strákunum

Sigurður Ingimundarson landsliðsþjálfari var að vonum himinlifandi eftir góðan sigur Íslands á Dönum í Álaborg í kvöld.

„Það er alltaf gott að vinna og sérstaklega í Danmörku. Það sagði mér fróður maður að við hefðum ekki unnið hér í ansi mörg ár og það gerir þetta enn ánægjulegra," sagði landsliðsþjálfarinn kátur.

„Þetta var virkilega góður leikur af okkar hálfu. Það var annars fyrst og fremst sterk vörn og frábært hugarfar hjá strákunum sem tryggðu okkur þennan sigur," sagði Sigurður sem þakkaði enn fremur þeim Íslendingum sem mættu á leikinn og studdu vel við bakið á íslenska liðinu.