Bolt auðveldlega í úrslit í 200 metra hlaupinu

Fljótasti maður allra tíma, Jamaíkamaðurinn Usain Bolt, skokkaði sig afar auðveldlega inn í úrslit í 200 metra hlaupinu á HM í Berlín áðan.

Bolt tók forystu í hlaupinu snemma og virtist vera í skemmtiskokki síðustu 30 metrana.

Hann var þess utan búinn að hægja á sér og var með bremsuna á tíu metrum áður en hann kom í mark.

Engu að síður var tíminn frábær eða 20,08 sekúndur. Hann á því mikið inni og ekki ólíklegt að heimsmetið í 200 metra hlaupinu falli í úrslitahlaupinu.

Heimsmet Bolt frá því á ÓL í Peking er 19,30 sekúndur.