Jóhanna á kjörstað: Ákvað sig fyrir þrjátíu árum

Jóhanna Sigurðardóttir forsætisráðherra og formaður Samfylkingarinnar sagðist hafa ákveðið hvað hún ætlaði að kjósa fyrir þrjátíu árum síðan þegar hún mæti á kjörstað í Hagaskóla fyrir stundu. Hún sagði sumar í lofti og að Samfylkingin ætlaði að vinna kosningarnar.

Þetta sagði Jóhanna í samtali við Bylgjuna en þeir Þorgeir Ástvaldsson, Kristófer Helgason og Bragi Guðmundsson eru á ferðinni í Reykjavík í dag. aðspurð hvort kosningabaráttan hefði snúist um þau mál sem Samfylkingin legði áherslu á svaraði Jóhanna því játandi.

„Já ég hygg að þjóðin vilji ræða um framtíðina og við sjáum hana með ESB. Við höfum mest rætt um heimilin í landinu og atvinnulífið, þetta hefur allt verið í umræðunni," sagði Jóhanna.

Hún hvatti fólk til þess að drífa sig á kjörstað. „Nú er tækifærið að koma hér á jafnaðarsjórn í landinu. Þetta eru sögulegar kosningar því nú er góður möguleiki á að vinstrimenn og jafnaðarmenn geti náð meirihluta, það er sögulegt tækifæri."