Nadal keppir ekki á Wimbledon

Rafael Nadal mun ekki verja titilinn sinn á Wimbledon-mótinu í tennis þar sem hann er meiddur á hné.

Nadal reyndi allt sem hann gat til að ná sér góðum fyrir mótið en varð að játa sig sigraðan á endanum.

„Þetta var ein erfiðasta ákvörðun sem ég hef þurft að taka á mínum ferli," sagði Nadal.

Þetta er í fyrsta sinn síðan 2002 að meistarinn mun ekki verja titil sinn á Wimbledon-mótinu þegar að Goran Ivanisevic tók ekki þátt.

„Ég hef verið að spila þrátt fyrir meiðslin undanfarna mánuði og ég reyndi hvað ég gat. En ég get ekki meir," sagði Nadal en var þess fullviss að hann gæti jafnað sig á meiðslunum.