Kaupmáttaraukningin 2004 til 2008 horfin í kreppunni

Nærri lætur að öll kaupmáttaraukning launafólks á tímabilinu 2004 til 2008 hafi þurrkast út í kreppunni sem skall á eftir bankahrunið haustið 2008.

Þetta kemur fram í Morgunkorni greiningar Íslandsbanka þar sem fjallað er um nýjar upplýsingar um launavístöluna og kaupmátt launa.

Kaupmáttur launa minnkaði um 0,5% í október frá fyrri mánuði, en undanfarna tólf mánuði hefur hann aukist um 2,6% ef miðað er við vísitölu neysluverðs. Þetta er fimmti mánuðurinn í röð sem kaupmáttur launa hækkar miðað við tólf mánaða taktinn en þar á undan hafði hann lækkað linnulaust allt frá ársbyrjun 2008 vegna mikillar verðbólgu á sama tíma og lítil breyting var á launum.

„Hefur kaupmáttur launa nú rýrnað um 10,8% frá því að hann var hér mestur í janúar árið 2008 og er nú á svipuðum stað og hann var árið 2003. Því lætur nærri að kreppan hafi þurrkað upp alla kaupmáttaraukninguna sem átti sér stað á tímabilinu 2004-2008," segir í Morgunkorninu.

„Kaupmáttur ráðstöfunartekna hefur raunar að jafnaði dregist enn meira saman þar sem hlutfall tekjuskatts hefur hækkað hjá meirihluta launþega. Jákvæðari þróun virðist nú vera hafin í innbyrðis þróun launa og verðlags og reikna má með því að kaupmáttur launa aukist hóflega á næstunni og þá einna helst vegna frekari hjöðnunar verðbólgunnar."