Möguleg markaðsmisnotkun í Kauphöllinni til rannsóknar

Kauphöllin rannsakar viðskiptahætti sem áttu sér stað á markaði með ríkisbréf rétt fyrir lokun í dag. Fimm mínútum fyrir lokun markaða er svokallað uppboðstímabil þar sem hægt er að setja inn kaup- og sölutilboð. Nokkur stór sölutilboð, eða samtals að upphæð 400 milljónir króna, komu inn rétt fyrir lokun markaða frá sama aðila en voru fjarlægð skömmu síðar. Ef tilboðin hefðu hangið inni hefði það þýtt talsverða lækkun á markaðnum og hækkun á ávöxtunarkröfu.

Samkvæmt heimildum fréttastofu rannsakar Kauphöllin hvort um hugsanlega markaðsmisnotkun geti verið að ræða, en viðskiptahættir sem þessir eru mjög sjaldgæfir í Kauphöllinni.