Halldór Ingólfsson: Menn læra af þessu

„Við vorum að keppa við lið sem er mun betra en okkar lið. Við þurftum að spila yfir getu til að halda í við þá en náðum því ekki í dag," sagði Halldór Ingólfsson, þjálfari Hauka, sem steinlágu fyrir Grosswallstadt á Ásvöllum í dag.

Þetta var síðari viðureign liðanna í EHF-bikarnum en þýska liðið vann með ellefu marka mun í dag. Haukar töpuðu þó fyrri leiknum í Þýskalandi fyrir viku með aðeins tveggja marka mun. Hver var munurinn á þessum tveimur leikjum? „Í Þýskalandi náðum við að spila frábæran varnarleik og keyrðum hraðaupphlaupin grimmt á þá. Við fengum það ekki í dag og það er kannski stærsti munurinn. Á móti þá spiluðu þeir varnarleikinn aggresíft og stigu langt út á móti okkur," sagði Halldór.

„Við lentum í of mörgum tæknifeilum og komumst lítið áleiðis í byrjun leiks. Þá var um að gera að leyfa yngri leikmönnum að fá tækifærið. Menn læra af þessu og setja í reynslubankann."

Það er skammt stórra högga á milli hjá Haukum en þeir eiga grannaslag við FH næsta þriðjudag. „Það er skemmtilegast í þessu að spila alvöru leiki fyrir framan fullt hús," sagði Halldór.