Kröfuhafar Kaupþings gætu fengið borgað eftir ár

Þetta kemur fram í viðtali Bloomberg fréttaveitunnar við Ólaf Garðarson formann slitastjórnar Kaupþings. Ólafur segir að slitastjórnin muni bjóða kröfuhöfum upp á einhverskonar fjármálagerning eftir ár. „Þeir sem þurfa fé geta fengið borgað í reiðufé en þeir sem vilja sjá betri endurheimtur af fjárfestingu sínum geta slakað á og beðið," segir Ólafur.

Ólafur segir að kröfuhafar hafi sjálfdæmi um hvernig staðið verði að uppgjöri gagnvart þeim. Öllum kröfuhöfum verður gerð grein fyrir stöðu sinni, og krafna sinna, og fundi þann 3. desember n.k.

Reiknað er með að kröfuhafar fái 26,25% af kröfum sínum greiddar hjá Kaupþingi. Í heild nema kröfurnar 56 milljörðum dollara.