Katrín segir skoðanir samráðherra upphlaupskenndar

Katrín Júlíusdóttir iðnaðaráðherra segir skoðanir umhverfisráðherra á eignarhlut Magma á HS orku upphlaupskenndar. Það eigi ekki við nein rök að styðjast að iðnaðarráðuneytið hafi veitt magma faglega ráðgjöf um hvernig fyrirtækið gæti farið á svig við lög til að skjóta rótum á íslenskum orkumarkaði.

Katrín Júlíusdóttir iðnaðarráðherra undrast fréttir um að ráðuneyti hennar hafi veitt Magma Energy faglega ráðgjöf um það hvernig fyrirtækið ætti að komast framhjá lögum við kaup á HS Orku, eins og fullyrt hafi verið í Ríkisútvarpinu í gær. Hún hafi skoðað þessi mál í gær og dag og sjá engin merki þess að ráðuneytið hafi átt einhvern þátt í að leiðbeina Magma á þessum nótum og verið þátttakandi í ákvarðanatöku fyrirtækisins. „Iðnaðarauneytið hefur engin slík umsvif að vera að veita lögfræðiráðgjöf til fyrirtækja á borð við Magma," segir Katrín. Hún segir að umhverfisráðherra hefði átt að kynna sér málið betur áður en hún gaf út yfirlýsingar um málið í fréttum í gær.

Iðnaðarráðherra segir ráðuneyti hennar ekki leiðbeina neinum um það hvernig fara eigi á svig við lög. „Hins vegar koma hundruð manna og lýsa fyrirætlunum sínum um stofnum fyrirtkæja og einar eða aðrar fyrirætlanir," segir Katrín. Ráðuneytið geri ekki annað en að veita upplýsingar um lög sem taka þurfi tillit til.

Hún segist vita af fundi í ráðuneytinu hinn 30. apríl 2009, áður en hún settist í stól ráðherra. Þar hafi ekkert annað verið gert en að veita upplýsingar um hvaða löggjöf menn þyrftu að taka tillit til þegar þeir hæfu starfsemi hér á landi.

Katrín segir að magma hljóti að hafa lögmenn á sínum snærum til að fræða fyrirtækið um íslensk lög og geti varla ætlað að treysta á iðnaðarráðuneytið í þeim efnum. Umhverfisráðherra sagði í fréttum okkar í gær að hún vildi láta rannsaka aðdragandann a'ð kaupum Magma á HS orku. Iðnaðarráðherra segist ekki átta sig á hvað eigi að rannsaka. Sveitarfélög hafi selt fyrirtækið til einkaaðila sem hafi svo selt það öðrum einkaaðilum. „Já mér finnst það undarlegt því að það hefur alltaf legið fyrir," segir Katrín. Það séu engar nýjar fréttir í þeim efnum.