Rassskelling í Íslendingaslag

GIF Sundsvall vann í kvöld 5-0 sigur á Öster í Íslendingaslag í sænsku B-deildinni.

Davíð Þór Viðarsson er fyrirliði Öster og spilaði allan leikinn í kvöld.

Ari Freyr Skúlason lagði upp eitt marka Sundsvall í leiknum og spilaði allan leikinn. Hannes Þ. Sigurðsson var varamaður og kom ekki við sögu.

Sundsvall er í mikilli baráttu um að komast upp í sænsku úrvalsdeildina á ný. Liðið er í þriðja sæti deildarinnar með 49 stig eftir 28 umferðir, þremur stigum á eftir toppliði Norrköping og einu á eftir Syrianska.

Öster er hins vegar í harðri fallbaráttu og er í þriðja neðsta sæti deildarinnar, þremur stigum frá fallsæti.

Tvær umferðir eru eftir og ljóst að Öster þarf, í besta falli, að taka þátt í umspilsleikjum um að halda sæti sínu í deildinni.