Verulega dregur úr fjölda gjaldþrota milli ára í september

Í september 2010 voru 53 fyrirtæki tekin til gjaldþrotaskipta samanborið við 86 fyrirtæki í september 2009.

Þetta kemur fram á vefsíðu Hagstofunnar. Þar segir að eftir atvinnugreinum voru flest gjaldþrot í byggingarstarfsemi og mannvirkjagerð. Fyrstu 9 mánuði ársins 2010 er fjöldi gjaldþrota 674 sem er rúmlega 5% aukning frá sama tímabili árið 2009 þegar 641 fyrirtæki voru tekin til gjaldþrotaskipta.

Í september 2010 voru skráð 121 ný einkahlutafélög (ehf) samanborið við 184 einkahlutafélög í september 2009, sem jafngildir rúmlega 34% fækkun milli ára.

Heildarfjöldi nýskráðra einkahlutafélaga er 1233 fyrstu 9 mánuði ársins og hefur nýskráningum fækkað um 35% frá sama tímabili árið 2009 þegar 1895 ný einkahlutafélög voru skráð. Eftir atvinnugreinum voru flest einkahlutafélög skráð í Heild- og smásöluverslun, viðgerðir á vélknúnum ökutækjum.