Michael Porter kynnir rannsóknina

Skrifað hefur verið undir samkomulag milli ráðgjafarfyrirtækisins Gekon og Arion banka um að bankinn verði aðalbakhjarl rannsóknar á klasamyndun í íslenskum jarðvarmageira. Rannsóknin sem er unnin undir forystu dr. Michael Porter, prófessors við Harvard-viðskiptaháskólann, verður kynnt á ráðstefnu í Háskólabíói 1. nóvember næstkomandi.

„Michael Porter er einn helsti fræðimaður heims á sviði stefnumótunar og samkeppnishæfni þjóða, og höfundur klasakenningarinnar svokölluðu (e. Clust­er policy),“ segir í tilkynningu um samstarfið. Kenningin tekur til myndunar sérhæfðra klasa, svo sem á sviði hátækni, sjávarútvegs, iðnaðar eða jarðvarma, sem gera eiga samfélögum kleift að rækta styrkleika sína með skilvirkum og árangursríkum hætti.

Michael Porter kynnir rannsókn sína og með hvaða hætti best sé að haga uppbyggingu íslensks jarðvarmaklasa á ráðstefnunni. Einnig fjallar dr. Christian Ketels, einnig frá Harvard, um einkenni íslenskra jarðvarmaklasa og Katrín Júlíusdóttir iðnaðarráðherra ræðir hlutverk stjórnvalda. - óká