Stjórn VBS hafði ekki heimild ráðuneytis til lánabreytinga

Stjórnendur VBS fjárfestingarbanka leituðu ekki eftir samþykki hjá fjármálaráðuneytinu um form- eða skilmálabreytingar á veittum lánum félagsins. Hvorki á lánum veittum til starfsmanna né til annara viðskiptamanna félagsins.

Þetta kemur fram í svari fjármálaráðherra við fyrirspurn Eyglóar Harðardóttur þingsmanns Framsóknarflokki á Alþingi um málefni VBS fjárfestingarbanka en ríkissjóður veitti fyrirtækinu 26 milljarða kr. lán vegna veðskulda í mars 2009.

Eygló spurði m.a. hvort stjórnendur VBS fjárfestingarbanka hafi leitað samþykkis ráðuneytisins og/eða Fjármálaeftirlitsins fyrir lengingu kúlulána sem þeir voru með hjá bankanum til ársins 2017? Samrýmist sú framlenging skilyrðum sem ráðuneytið setti fyrirtækinu við gerð lánasamnings vegna veðskulda við Seðlabankann?

Í svari ráðherra segir: „Í skilyrðum sem veitt voru fyrir láni ríkisins má lesa að lánveiting til venslaðra aðila skuli ekki aukin og að aukning útlána er ekki bönnuð. Það getur verið skilgreiningaratriði hvort lenging lána sé í eðli sínu nýtt lán eða ekki. Ef hún er metin sem nýtt lán er mögulega brotið gegn 6. gr. lánasamningsins (hann má finna á heimasíðu fjármálaráðuneytisins) þar sem kveðið er á um að „vöxtur útlánasafns leiði ekki til skerts endurgreiðsluhæfis lántaka" og þá einnig 9. gr. þar sem segir „fyrirgreiðslum við venslaða aðila skal ætíð stillt í hóf og hagsmuna ríkissjóðs gætt í hvívetna við slíkar fyrirgreiðslur".

Fjármálaráðuneytið hefur enga vitneskju um hvort og þá hvernig staðið var að fyrirgreiðslu til starfsmanna á umræddu tímabili og er því ekki í stakk búið til að meta hvort hagsmunum lánveitanda hafi ekki verið gætt í hvívetna."

Stjórn VBS fjárfestingarbanka óskaði eftir því við Fjármálaeftirlitið 3. mars 2010 að skipuð yrði bráðabirgðastjórn yfir bankann. Í því fólst að þáverandi stjórn fór frá og bráðabirgðastjórn tók yfir hlutverk stjórnar. VBS fjárfestingarbanki hf. var svo tekinn til slitameðferðar 9. apríl 2010 með úrskurði Héraðsdóms Reykjavíkur.